Farskóli leiðtogaefna sem hefur unnið sér fastan sess í leiðtoganámi kirkjunnar hefur nú göngu sína að nýju. Námskeiðið er miðað við áhugasama unglinga á aldrinum 15-17 ára sem aðstoða í starfi eða hafa hug á að starfa með börnum og/eða unglingum innan kirkjunnar.
Verkefnið er samstarf Æskulýðsnefnar Kjalarnessprófastsdæmis, ÆSKR, Biskupsstofu og ÆSKÞ. Markmið með farskóla leiðtogaefna er að undirbyggja faglegt starf með hæfum og góðum leiðtogum í barna- og unglingastarfi kirkjunnar. Viðfangsefni námskeiðsins er m.a. fræðsla um kristna trú, kirkjuna, starf hennar og fleira. Um leið og áhersla er lögð á að sinna hverjum þátttakanda og uppbyggingu hvers og eins er mikið lagt upp úr því að skapa gott samfélag í hópnum, meðal annars með áherslu á helgistundir.
Farskólinn er ætlaður sem stuðningur við söfnuðina í því að byggja upp leiðtoga og því er mikilvægt að samhliða farskólanum sé leiðtogaefnunum sinnt af þeim sem bera ábyrgð á æskulýðsstarfi í söfnuðinum og að þeim séu falin verkefni við hæfi í starfinu svo þau fái þjálfun í sínum heimasöfnuði samhliða námskeiðinu.
Námskeiðið er fyrir unglinga sem starfa í kirkjum í Reykjavíkur- og Kjalarnesprófastsdæmum og flyst á milli þeirra kirkna sem þátttakendur koma frá. Þær kirkjur sem senda leiðtogaefni á námskeiðin þurfa því að vera tilbúnar að vera með eina samveru.
Starfsmaður námskeiðsins heldur utan um námskeiðið og sér um fræðsluna. Æskulýðsfulltrúar, prestar eða djáknar viðkomandi kirkju taka þátt í stundinni eftir þörfum.
Kennsluefninu er skipt upp í A og B hluta og er gert ráð fyrir að hvor hluti taki eitt ár í yfirferð. Ekki skiptir máli hvor hlutinn er tekinn á undan en æskilegast er að þátttakendur taki báða hluta námskeiðsins.
Námskeiðið hefst 5. október kl.18.00 í Grensáskirkju. Leiðbeinandi er Sigríður Rún Tryggvadóttir guðfræðingur og framkvæmdarstjóri ÆSKÞ. Þátttökugjald fyrir hvern þátttakanda á námskeiðinu er óbreytt frá síðustu árum, eða 13.500.- kr.
Kennslan fer öllu jafna fram á miðvikudagskvöldum en auk þess verður gist yfir nótt í kirkju á haustönn, aðstoðað í Hjálparstarfinu í desember og langur laugardagur í janúar. Mætingarskylda er á námskeiðinu.
Skráningar fara fram hjá Kristínu Arnardóttur á fræðslusviði Biskupsstofu í síma 5284065 eða á netfangið kristin.arnardottir@kirkjan.is .
Síðasti skráningardagur er mánudagurinn 3. október.
