Aðalþema prédikunarseminarsins 2010 er Jesús og jaðarfólkið. Um efnið verður fjallað í hugleiðingum, samtali, erindinum og vinnustofum.
Áttunda prédikunarseminar Kjalarnessprófastsdæmis verður haldið í Skálholti 10.-12. október. Það hefur yfirskriftina Jesús og jaðarfólkið. Þetta þema verður tekið fyrir í fjórum hugleiðingum sem allar ganga út frá því sem Jesús bendir á í guðspjöllunum um fyrirmynd jaðarfólksins þegar kemur að trúnni.
Aðalfyrirlesari að þessu sinni er Wilfried Engemann sem fjallar í erindum sínum m.a. um mannskilning í málfari helgihaldsins og um list samtalsprédikunarinnar.
Gestur kvöldstofu við arineld verður Hilmar Örn Hilmarsson, allsherjargoði ásatrúarmanna á Íslandi. Hann ætlar að eiga spjall um mannskilning og náttúru í trúarvitund ásatrúarmanna.
