Fréttir

Á hverjum degi á aðventunni og fram að jólum munu birtast á falleg og uppörvandi  myndskeið þar sem fólk með allskonar bakgrunn úr starfi kirkjunnar fjallar um þýðingu og boðskap aðventunar. Yfirskrift dagatalsins er „Kom þú, kom“ og er sótt í sálm nr. 70: „Kom þú, kom vor Immanúel. Orðið aðventa er úr latínu og merkir koman eða sá sem kemur og vísar til undirbúningstímans fyrir jól þegar við undirbúum komu Jesú Krists.

Jóladagatal er samstarfsverkefni prófastdæmisins og Þjóðkirkjunar. Myndskeiðin eru frá kirkjum á Suðurnesjum, Hafnarfirði, Álftanesi, Garðabæ, Mosfellsbæ, Kjós og Kjalarnesi. Markmiðið með jóladagatalinu er að minna á boðskap aðventunnar sem er tími vonar og eftirvætingar þegar við íhugum og skoðum hvað gefur lífinu gildi og tilgang. Einnig að vekja athygli á margvíslegum mannauði kirkjunnar, sjálfboðaliðum, starfsfólki og þátttakendum í kirkjustarfinu.

Hægt er að fylgjast með jóladagatalinu hér á heimasíðunni eða Facebókasíðu prófastsdæmisins.

Njótum aðventunnar.

Sunnudaginn   20. júní, vígði Agnes M. Sigurðardóttir, biskup Íslands, keltneskt útialtari á Esjubergi á Kjalarnesi. Það er reist til að minnast fyrstu kirkjunnar sem um er getið í íslenskum ritheimildum, Landnámubók og Kjalnesingasögu, og landnámsmaðurinn, Örlygur Hrappsson, mun hafa reist á Esjubergi um árið 900. Nánar

Héraðsfundur Kjalarnessprófastsdæmis verður fimmtudaginn 20. maí í safnaðarheimili Innri-Njarðvíkurkirkju, Reykjanesbæ og hefst með helgistund kl. 17:30. Héraðsfundur fyrir árið 2020 var ekki haldinn vegna samkomutakmarkanna og því verða mál frá þeim fundi afgreidd núna. Nánar

Nú í desember fram að jólum verður jóladagatal í samstarfi við kirkjur á Suðurnesjum, Hafnarfirði, Álftanesi,Garðabæ, Mosfellsbæ, Kjós og Kjalarnesi. Á hverjum degi birtist stutt myndband þar sem fólk með margvíslegan bakgrunn úr kirkjustarfinu fjallar um vonina, aðventuna og jólin. Yfirskrift dagatalsins er „Sú von er sönn“.

Markmiðið með jóladagatalinu er að minna á boðskap aðventunnar sem er tími vonar, þegar við beinum sjónum okkar að komu  Jesú Krists og íhugum og skoðum hvað það er sem gefur lífinu gildi í raun og veru. Einnig að vekja athygli á öflugum mannauði kirkjunnar, sjálfboðaliðum, starfsfólki og þátttakendum í kirkjustarfinu.

Hægt er að fylgjast með jóladagatalinu hér á heimasíðunni eða Facebókasíðu prófastsdæmisins.

Njótum aðventunnar.

Biskup Íslands, sr. Agnes M. Sigurðardóttir, hefur útnefnt sr. Hans Guðberg Alfreðsson sem prófast í Kjalarnessprófastsdæmi frá og með 1. desember.

Sr. Hans Guðberg er fæddur 1971 og vígðist sem prestur til Garðaprestakalls (Álftanes og Garðarbær) árið 2006.

Í dag er allra heilagra messa, en það er dagur helgaður minningu látinna ástvinna. Það er dagur sem við stöldrum við og rifjum upp fallegar og kærar minningar um látna ástvini. Í tilefni þessa dags opnar Kjalarnessprófastsdæmi vef um útför í kirkju, www.utforikirkju.is.  Í útför komum við saman til að þakka og kveðja látinn ástvin hinsta sinni, þökkum fyrir líf hans og allt það sem við fengum að njóta með honum. Nánar

Sunnudaginn 4. okt. kl. 14:00 mun prófastur, sr. Þórhildur Ólafs, prédika við sameiginlega guðsþjónustu Garða- og Bessastaðasóknar í Garðakirkju. Guðsþjónustan er hluti af vístasíu prófasts sem fram fer þennan dag í Vídalíns- og Garðakirkju, en áður hefur hún vísterað Bessastaðasókn. Sr. Jóna Hrönn Bolladóttir og sr. Henning Emil Magnússon þjóna fyrir altari. Félagar í kór Vídalínskirkju syngja og organisti er Jóhann Baldvinsson. Allir velkomnir.

Prófastur vísiterar söfnuði prófastsdæmsins með reglubundnum hætti og í því felst að hún heimsækir kirkjur, safnaðarheimili, kirkugarða, grafreiti, áritar gerðabækur og á fund með sóknarnefnd, prestum og djáknum.

Dagskrá prófastsdæmisins fyrir árið 2020 er að finna á https://kjalarpr.is/dagatal/, m.a. dagsetningar funda, samvera oþh. Héraðsfundur Kjalarnessprófastsdæmis sem var frestað í vor verður í safnaðarheimili Njarðvíkurkirkju fimmtudaginn 29. október, kl. 17:30. Auk þess er á dagskrá prófasts að vísitera söfnuði prófastsdæmisins og að því tilefni vera með sameiginlegar messur á Suðurnesjum, Hafnarfirði og Garðabæ. Nánar

Á æskulýðsdagi þjóðkirkjunnar sem var 1. mars stóðu börn og unglingar í Kjalarnessprófasastsdæmi fyrir söfnun fyrir munaðarlaus börn í Úganda í samstarfi við Æskulýðssamband kirkjunnar í Kjalarnessprófastsdæmi. Alls söfnuðust 268.702.- kr. sem hefur verið  afhent Hjálparstarfi kirkjunnar. Söfnunarféið verður notað til þess að byggja steinhús með bárujárnsþaki fyrir munaðarlaus börn í Úganda. Söfnunin hefur farði fram árlega síðastliðin fjögur ár og fólst í því að börn og unglingar í æskulýðsstarfinu standa fyrir vöfflu- og veitingasölu eftir messu á æskulýðsdaginn.

Með steinhúsi fá munaðarlaus börn í Úganda skjól fyrir næturkuldanum og rigningunni og einnig hægt að halda hreinu og hlýju. Húsið er múrað og skordýr verpa ekki í holum í veggjunum eins og í moldarkofunum. Minna verður um smit og veikindi. Af bárujárnsþakinu má safna vatni sem dugar 3-4 mánuði inn í þurrkatímann. Munaðarlausir unglingar í iðnnámi smíða gluggakarma, dyrastafi og læra múrverk af að reisa húsin. Nýtt hús gefur stolt, bjartsýni og von um að nú verði allt auðveldara og betra.

Nú yfir sumarið taka söfnuðir höndum saman og standa fyrir fjölbreyttu helgihaldi yfir sumartímann, m.a. á Suðurnesjum og í Hafnarfirði, Garðabæ og Álftanesi.

Kirkjurnar á Suðurnesjum í Grindavík, Reykjanesbæ, Garðinum og Sandgerði sameinast um helgihaldið yfir sumartímann og messað er til skiptis í kirkjunum. Þar ræður fjölbreytnin ríkjum og boðið m.a. upp kvöld-, pútt-, göngu- og ratleikjamessa.

Í Garðakirkju skipta prestar, djáknar, organistar og starfsfólk Hafnarfjarðar, Vídalíns-, Víðistaða-, Bessastaða- og Ástjarnarkirkju auk Fríkirkjunnar í Hafnarfirði með sér þjónustunni við messu hvern sunnuag yfir sumarið. Á eftir er boðið upp á kaffi og notalegt samfélag í hlöðinni á burstarbænum Króki.